2009/08/24

موضوع داش عرض


السلام عليكـم ورحمـة الله




اليوم طـق أبالـي موضوع , معنـى المفروض موقتـه هالموضوع لأنه احنا بشهر فضيل
وأي موضوع من هالمواضيع المفروض أني أطردها من بالـي
بس الشيطان يخلينا out of control ويشتت مخي بعض المرات الله يطقع بليسه
ويخليني أسرح وأمرح بالتفكيـر


موضوعي شوي عبيط وشوي غبي


العـرس شي مُقدّس عندنـا بالخليـج ,ومافـي مانـع من هالشي ولابد منه
ومن حـق الكـل يفرح بزواج عياله
المشكلـه ألحيـن مو بفكـرة العـرس المشكلـه بألي يصير داخل العرس !!



ألحيـن بالــ عرووس والحفلات ليش الواحد يرقص بروحه جنه عبيط ؟
ليش مانرقص مثل الأجانب couples أثنين أثين مع بعض ,حريم وحريم أكيد
بس أمانه يعني شكلنا مو عبيط .. وأحنا ندق سلف ونرقص سيده خط مستقيم وأذا وصلنا لي آخــر القاعـه نطقها U-turn
ونلف ونكمـل سيـده ونرقص
يعني شهالخبال نرقص بروحنـا ؟؟ يعني شنو وحده ياها الطرب وودها اتونس وتهز عالوحده ونص ويارايحه وراده بقاعـة


ليش مايصير شكلنا أذرب من جذي ,حرمتيـن مع بعـض يرقصـون وخلصنـه
ولا أنتو شرايكـم ؟ مافكرتـو مرة هالتفكيـر؟









2009/08/19

أصداء مجزرة الجهراء في أمريكـا

السلام عليكم ورحمة الله وبركاته


بدايـةً .. عظـم الله أجركم جميعـا بشهداء الكويـت
والله أنـا لي ألحين مومستوعبة هول المصيبة الي صارت
حريم أختنقو من الحريجة ..غشو .. وأشتعلو بهالنيران ..وتحرقو تحرّق إليما ماتو
لحظـة لحظـة خل أستوعب عدل إلي صار والله موداش عقلي منظـر الي صاير من هول الوضع
.
.

طبعـا الجميع ضاق خلقه حتى أهالـي الكويت إلـي بـرى الديـرة .
حتـى أمـس يوم كنت بالـ national museum فـي washington DC
شفت وحدة بالاسنصير أبتسمت بويها وسلمـت عليّ


-من الكويـت ؟
- أي نعم :) , وانتو من وين ؟
- السعوديـة , عظـم الله أرجكـم عالـّي صـار بالكويت
- اجرنا واجرج حبيبتي
- صراحـة ألي عندكم صار موشويــه , شي يعور القلب !!
- صاجـه والله , إن كيدهن عظيم وهذا قضاء الله وقدره



حتى الخليجيين الي بـرا الديرة يعزّونا بهالحادثه
صج مأســاة ألـي صار
شقول والله ؟ الله يجازي السبب آميـن
الله يصبر قلوب أهالي الموتي آميـن





’ حينما أصبحت كارثة الجهراء حديث للشارع السعودي !! ’

2009/08/17

درب الزلق

video





ماخلـو شـي والله
حتـى أشهر مقطع من درب الزلق سووه كرتون
بس صج ظابطينه !

2009/08/10

زغرووطـــة




ماتـدرون أشكثر مستانسـة على هالأنجـاز ألي توصلت لـه !

شـي قاعده أعابـل فيـه من أول مابطلت المدونـة وكل ما أحاول فيه أعجز أني أحققه

عابلت وعابلـت وحاولـت ويامـا يأسـت

بس بعـد محاولـة طويلة نزل علي الوحـي ورحت المكان الفلاني وطقطقت بهالكيبورد و بلحظات وصار ألي كنت أبيه !

صج انه اخذ مني ساعات من المحاولـة بــس بيوم من أيام المحاولـة مرة وحدة لقيت الي ابيه بظرف دقائق معدودة

دوختكم ولا قلت لكم شنو أهو الانجاز ,أدري نحاسه :)

اهو ’ قائمـة المدونات الألكترونيـة ’

يمكن بنظر الكل وليس البعض انه أمر سخيف ,بس صدقوني تعبت وانا احفظ المدونات بالfavorites

عاد دورو الحكمـه من الموضوع ;d







2009/08/05

وضعـي مثل الصورة الي حاطتهـا ×_×





باقـي دقائق معدودة ..

ودقات قلبـي متسارعـة , وكـل دقـة تسبـق الأخـرى ..

وكأنهم قد خاظـو سبـاق مـا

وكأنـي لم أعتـد على هذا اليوم .. وتحديدا فـي كــل عـام

ومازالـت الدقائـق الفاصـله .. بطيئـة , تكـاد أن تمـر حتـى تصـل الى الساعه الثانيـة عشر

لينطوِ يوم جديد





يوم مولــدي !

ويتخالجنـي ذلك الشعور فـي كل عام .. ولـم لا ؟

أنها لحظة مولدي ,يوم وجودي بهـذا العالـم العالم الذي خلتـه جميلا في صغري
وأتمنـى أن لايزول هذا الاختيال يومـاً , وما إن باتت الساعه الثانية عشر ليلا
والكشـرة من الأذن إلــــــــى الأخـرى , متحمسـة هذه المرة على غيـر عادة
منتظـرة التهانـي والتبريكـات ..
ولا مانـع من أستقبــال الهدايـة :p

.

.




مرت ساعــة على يوم ميلادي .. ساعتـان .. ثلاث .....ولـم أجـد بادره من أحد

لا أتصال .. ولا مسـج .. ولا حـس .. ولا خبـر

أنخمـدت نـار الحمـاس فـي قلبــي

وكأن قالــب من الثلـج أنهمـر علــى صدري

فخمّــد النار ولسعــه ببرودتـه ... برودة أقربائـي !

اقربائـي الذيـن لم يوجهو لـي " كـل عام وأنتـي بخير " لأفرح بهـا

كل عام واتني بخير حافـه ! بدون هداية أو تذكار حتـى !!

ولم أطمع بالهدايـة قطعـاً ولكــن كـم أُقـدِّر الأمور التي تخرج من القلب

وتترك بصمـة وذكـرى ,,

شيء بسيط يشعرنـي بقرب من حولـي ومدى حبهم إلـيّ ,, شيء يحسسنـي بالأنتمـاء إلـى قلوبهم


.
.



وكما قلت مسبقا ..سرعـان ماأختفى شعور الحماس.. والترقب.. وكل ماهو مبهر
ومر الوقـت طويلا ولم يبـادر أحـد .


وأذا بتلـك الصفعـة .. التـى أنهلـت على وجهـي منـي
وكأنـي أولّـد المعلومـة من عقلـي .. كولادة مستعسرة
معلومـة التـي كشفـت لـي عن مدى غبائـي وفطانتـي
وصار حالـي كحـال الصورة التـي بالموضوع


وكانت المعلومـة ..

أنـه عيد مولـدي ليس الــ 27 من الشهـر !!
بـل 28 .. واليوم هو 27 !!!!!!!
يااااااااااااه كم مرة أخطأت بنفس الخطأ سنيين وسنين ومازلــــت !
ولــم أكف عن أخطائــي .. غبية أنـا


والمضحك بالأمر .. أنـه حتـى يوم مولـدي الصحيح
لـم أجـد بادره ولا كل عام وأنتـي بخير من أحد :)


عدا أهلـي من هم معي بالسفـر.. لم يقصرو بشيء .. ويعطيهم العافيـة


شكـرا ..